الساقية

محمد طلبه الشاعر والأنسان

القطن مزهزه ع الشجر
و الليل بيغنى للقمـر
و الشاى ع الراكيه بيدفا
على صوت لمتنا للسهر
فتحت عنيا على امبارح
ولقيت أفراح و خيال طارح
و ليالي ملاح و فؤاد سارح
يتغزل ويا عباد الله
في جمال الكون
و الكون شارح
لكتاب مسطور
الكون بيلف ... الكون بيدور
الكون بيدّور ع الأيام
و بياخد حلم الضلمه لنور
يتحقق فيه هم الغلبان
فيبان مستور
الكون أمور
و مسـمسـم
زى الطفل الأسمر ساعة ما بيضحك
أمــور
و مطـاوع
زى بنات الوادي
و هـادى
زى بنات الحور
مش عارف ليه غمضت عنيا
وكإن جمال الكون حواليه صبح مألوف
قال رايحه تنام !!!
يا عنيا اصبرى
اعملى معروف
استنى شويه
أنا لسه باشوف
أنا لسه باشوف
ولافيش فايده
النوم سلطـان
غمضت و نمت
وصحيت ع الواقع
بيجر الساقية كما الحلوف
ويشد رحال العتمه المره
و يحج يوماتى لبيت الخوف
ويطـــوف
ويطـــوف
ويطـــوف

للشاعر محمد طلبه

تستضيف مكتبة طلعت حرب فى اولى امسياتها الشعرية بعد الافتتاح التجديدى للمكتبة
الشاعر المغمور محمد طلبة
فى امسية شعرية خاصة
بمصاحبة عازف العود ياسر المغربى وذلك تمام السادسة مساءا من يوم
السبت 11 / 8 / 2007-
العنوان : السيدة نفيسة – منطقة زينهم - بجوار مستشفى مغربي للعيون – امام مجمع فتحي سرور
للقادمين من ميدان التحرير مينى باص 114 من المحطة المقابلة لمسجد عمر مكرم

تبدأ الامسية فى تمام السادسة وتنتهى فى تمام الثامنة مساء

ونصيحة

المتعة هى الى منتظرانا ان شاء الله سواء سمعنا لشعر محمد طلبه بس او سمعنا لحواره المحترم الحميمى دائما

بعشم نفسي اسمع الى اتنين يا طلبه يوم السبت الى هو بكره

ان شاء الله

تمنياتى الى انت عرفها يا طلبه كويس بكل توفيق والى الامام يااااااامغمور

الصورة دي تصويري المغمور الأغمر إبراهيم باشا عادل